अर्घाखाँची । दलित समुदायको अधिकार संरक्षण, समान सहभागिता, सामाजिक न्याय तथा समावेशी विकासलाई संस्थागत गर्ने उद्देश्यका साथ अर्घाखाँचीका दलित जनप्रतिनिधिहरूको प्रथम जिल्ला सम्मेलन सम्पन्न भएको छ । सम्मेलनले ३१ बुँदे ‘मालारानी घोषणा–पत्र’ जारी गर्दै जिल्लास्तरीय १३ सदस्यीय दलित जनप्रतिनिधि सञ्जाल गठन गरेको छ ।
मालारानी गाउँपालिकाको आयोजनामा सम्पन्न सम्मेलन मालारानी गाउँपालिकाका अध्यक्ष दलबहादुर भट्टराईको अध्यक्षता तथा जिल्ला समन्वय समिति अर्घाखाँचीका प्रमुख जीवनारायण कोइरालाको प्रमुख आतिथ्यतामा सम्पन्न भएको हो । कार्यक्रममा मालारानी गाउँपालिकाकी उपाध्यक्ष दीपा पोख्रेलले स्वागत मन्तव्य व्यक्त गर्दै दलित जनप्रतिनिधिहरूबीच अनुभव आदानप्रदान, क्षमता अभिवृद्धि र साझा आवाज निर्माणका लागि सम्मेलन महत्वपूर्ण हुने बताउनुभयो ।
कार्यक्रममा भूमिकास्थान नगरपालिका वडा नं. ४ का वडाध्यक्ष बाबुराम पन्थी सुनारले सम्मेलनको उद्देश्य, आवश्यकता र औचित्यमाथि प्रकाश पार्दै दलित जनप्रतिनिधिहरूको प्रभावकारी भूमिका सुनिश्चित गर्न यस्ता कार्यक्रम निरन्तर हुनुपर्ने धारणा राख्नुभयो ।
दलित सञ्जाल अर्घाखाँचीका अध्यक्ष विष्णुबहादुर परियारले सम्मेलनको सफलताको शुभकामना व्यक्त गर्दै दलित समुदायको अधिकार सुनिश्चित गर्न सबै तहका जनप्रतिनिधिहरू एकजुट हुनुपर्नेमा जोड दिनुभयो ।
सम्मेलनअन्तर्गत सञ्चालन गरिएको प्रशिक्षण सत्रमा अधिवक्ता कृष्ण विश्वकर्माले संविधान तथा प्रचलित कानुनमा दलित समुदायका अधिकार, संरक्षणका व्यवस्था र कार्यान्वयनका चुनौतीबारे प्रशिक्षण दिनुभयो । मालारानी गाउँपालिकाका प्रमुख प्रशासकीय अधिकृत गोविन्द भट्टराईले स्थानीय तहमा जनप्रतिनिधिहरूको भूमिका, जिम्मेवारी तथा सुशासनका विषयमा सहजीकरण गर्नुभएको थियो । सन्धिखर्क नगरपालिकाका संस्थापक नगर प्रमुख ठाकुरकुमार विश्वकर्माले दलित जनप्रतिनिधिहरूका अवसर, चुनौती र नेतृत्व विकासका विषयमा प्रशिक्षण प्रदान गर्नुभयो ।
सम्मेलनमा सहभागी विभिन्न स्थानीय तहका दलित जनप्रतिनिधिहरूले आफ्नो कार्यअनुभव, स्थानीय तहमा देखिएका चुनौती, सफल अभ्यास तथा आगामी रणनीतिबारे खुला छलफल गरेका थिए । सहभागीहरूले दलित समुदायको सशक्तीकरणका लागि साझा अभियान सञ्चालन गर्नुपर्ने आवश्यकता औँल्याएका थिए ।
सम्मेलनले ३१ बुँदे ‘मालारानी घोषणा–पत्र’ जारी गर्दै दलित समुदायको राजनीतिक, सामाजिक, आर्थिक तथा सांस्कृतिक अधिकारको संरक्षण, निर्णय प्रक्रियामा समान सहभागिता, विभेदको अन्त्य, शिक्षा, स्वास्थ्य, रोजगारी र समावेशी विकासलाई प्राथमिकतामा राख्ने प्रतिबद्धता जनाएको छ
त्यसैगरी सम्मेलनले १३ सदस्यीय दलित जनप्रतिनिधि जिल्ला सञ्जाल, अर्घाखाँची गठन गरेको छ । सञ्जालको संयोजकमा लिलबहादुर बि.क., सचिवमा ठाकुर सौराग, कोषाध्यक्षमा शारदा परियार तथा सदस्यहरूमा नन्दलाल विश्वकर्मा,मानबहादुर नेपाली,लक्ष्मी सुनार, कृष्ण नेपाली,रेशमी बि.क.,भुमा परियार, श्यामकुमार बि.क. र सुन्तली बि.क. चयन हुनुभएको छ।
यस्तै, भूमिकास्थान नगरपालिका वडा नं. ४ का वडाध्यक्ष बाबुराम पन्थी सुनारको संयोजकत्वमा मानबहादुर बि.क.,चुराबहादुर बि.क.,मीना परियार र विष्णु बि.क. सदस्य रहेको सल्लाहकार समिति पनि गठन गरिएको छ ।
जिल्लाका विभिन्न स्थानीय तहका दलित जनप्रतिनिधि, सरोकारवाला निकायका प्रतिनिधि तथा विभिन्न क्षेत्रका अतिथिहरूको उल्लेखनीय सहभागिता रहेको सम्मेलनले जिल्लामा दलित जनप्रतिनिधिहरूबीच समन्वय, सहकार्य र साझा आवाजलाई अझ प्रभावकारी बनाउने विश्वास व्यक्त गरेको छ । सम्मेलनबाट जारी ‘मालारानी घोषणा–पत्र’ ले दलित समुदायको अधिकार संरक्षण, समान अवसरको सुनिश्चितता, सामाजिक न्यायको प्रवर्द्धन तथा समावेशी विकासलाई थप संस्थागत बनाउन महत्वपूर्ण आधार तयार गर्ने अपेक्षा गरिएको आयोजकले जनाएको छ।
